Davíð hefur ekki gefið Jóhönnu svar

Efnahagsmál Ríkisstjórnin ætlar að breyta lögum um Seðlabanka Íslands og leggja fram á Alþingi síðar í vikunni. Jóhanna Sigurðardóttir forsætisráðherra segir að reynt verði að semja við seðlabankastjórana um starfslok sem kosti „ekki óheyrilega mikið“.

Tólf mánaða starfslok séu ásættanleg enda ekki óalgeng.

„Það er ansi mikið ef bankastjórarnir fara að fullu fram á það sem þeir gætu átt rétt á, það gæti þá verið um 200 milljónir króna. Ég treysti seðlabankastjórunum til að líta ábyrgt á hlutina í því umhverfi sem við búum við og ganga til samninga um eðlileg starfslok,“ segir hún.

Jóhanna kveðst hafa fengið símtal frá Davíð Oddssyni seðlabankastjóra í gærmorgun en hann er staddur erlendis og kemur ekki til landsins fyrr en á föstudag. 

„Ég fékk ekki af eða á svar um það hvort þeir yrðu við þessari ósk ríkisstjórnarinnar um að víkja. 

Mér fannst á honum að hann þyrfti aðeins meiri tíma til að skoða þetta,“ segir Jóhanna og vill ekki segja hver næstu skref verða verði bankastjórarnir ekki við óskinni.

Siv Friðleifsdóttir, þingmaður Framsóknarflokksins, segir að ráðning seðlabankastjóra á faglegum forsendum sé í anda Framsóknarflokksins. 

„Við eigum eftir að sjá frumvarpið en ég tel að það komi frekar jákvæður tónn frá framsóknarmönnum.“

Pétur Blöndal alþingismaður segir að svona fyrirkomulag sé víða. Hann eigi eftir að sjá útfærsluna „en að sjálfsögðu styður maður góð mál hvaðan sem þau koma“. Ekki náðist í seðlabankastjórana í gær.