Klaga til samkeppnisyfirvalda

Veitingamenn og ferðaþjónustuaðilar telja að boðaðar skattahækkanir dragi úr atvinnuuppbyggingu og nýsköpun í greininni. Þeir ætla að leita til samkeppnisyfirvalda vegna hækkunar á virðisaukaskatti.

Ríkisstjórnin ætlar að hækka virðisaukaskatt á matarsölu veitingahúsa úr 7% í 14. Þá stendur einnig til að hækka bensín og olíugjald.

Veitingamenn og ferðaþjónustuaðilar telja að þetta muni hafa slæm áhrif á þeirra starfsemi.

„Þessar skattahækkanir hafa fyrst og fremst þau áhrif að þetta dregur úr áhuga manna á því að fara í þessa grein. Þetta dregur líka úr áhuga manna að markaðssetja landið," segir Friðrik Pálsson, hótelhaldari á Hótel Rangá

Í atvinnustefnu Vinstri grænna sem kynnt var fyrir síðustu kosningar er talið að fjölga megi störfum í ferðaþjónustu og tengdum greinum um rúmlega fjögur þúsund á næstu árum.

„En þegar að skattar eru hækkaðir þá gefur það auga leið að það fer beint út í verðlagið sem auðvitað fækkar gestum. Hvort sem það eru erlendir ferðamenn eða aðrir og ef að gestum fækkar þá fækkar starfsfólki," segir Friðrik.

Veitingamenn ætla að leita til samkeppnisyfirvalda vegna boðaðra breytinga á virðisaukaskatti. Þeir telja að breytingarnar mismuni söluaðilum enda fari það eftir sölustöðum hversu hár skattur er lagður á sömu matvöru.

Reglurnar kunna að vera svolítið flóknar en það skiptir t.d. máli hvar þú borðar. Fyrir brauð á veitingastöðum þarf að greiða 14% virðisaukaskatt en í verslunum er 7% skattur lagður á brauð.

„Þarna er komið alveg gríðarleg misrétti. Það er verið að semja sömu vöruna á sama hátt á sitthvoru skattþrepinu. Það fer eftir því hvort þú ert að kaupa hana út úr búð eða út af veitingastað," segir Erna Hauksdóttir framkvæmdastjóri Samtaka ferðaþjónustunnar.