Loksins sigur hjá Kristianstad í sænsku deildinni

Þjálfarinn Elísabet Gunnarsdóttir stýrði liði sínu Kristianstad til síns fyrsta sigurs í sænsku úrvalsdeild kvenna í dag þegar liðið lagði Stattena 4-0.

Hólmfríður Magnúsdóttir skoraði þriðja mark Kristianstad í leiknum en Guðný Björk Óðinsdóttir og Erla Steina Arnardóttir léku einnig með Kristianstad í dag.

Markvörðuinn Brett Maron sem áður lék með Aftureldingu var á varamannabekk Kristianstad í leiknum.

Þetta var sannkallaður kjallaraslagur þar sem Kristianstad skaust upp fyrir Stattena í næst neðsta sætið með sigrinum í dag sem var sá fyrsti í tíu leikjum í hinni gríðarlega sterku sænsku deild.