Maóistar felldu tvo lögreglumenn

Fjörutíu vopnaðir maóistar drápu tvo lögreglumenn og einn óbreyttan borgara þegar þeir réðust inn í dag á lögreglustöð Chhattisgarh fylki sem er í miðhluta Indlands. Í gær drápu þeir fimm lögreglumenn og særðu þrjá í austurhluta landsins.

Tveir maóistar féllu í átökunum á lögreglustöðinni og sex aðrir þegar þeir reyndu að komast undan, að sögn talsmanns lögreglunnar.

Samtök maóista sem segjast styðja fátæka bændur og landlausa vilja að kjósendur sniðgangi fyrirhugaðar kosningum í fimm fylkjum í Indlandi sem hefjast á fimmtudaginn. Undanfarnar vikur hafa maóistar sprengt upp skóla og opinberar byggingar og kveikt í heimilum frambjóðanda.

Þúsundir hafa fallið í ódæðum maóista í Indalandi frá því þeir hófu aðgerðir sínar á sjöunda áratug síðustu aldar. Manmohan Singh, forsætisráðherra Indlands, telur að maóistar séu ein mesta ógn við innra öryggi landsins.