Loksins vann Federer á Roland Garros

Svisslendingurinn Roger Federer skráði nafn sitt með gylltu letri í tennissöguna í dag. Þá tókst honum loksins að vinna opna franska meistaramótið.

Federer hefur þar með unnið öll risamótin í tennis og í heildina hefur hann unnið fjórtán risamót. Hann jafnaði með titlinum í dag met Bandaríkjamannsins Pete Sampras sem hafði einum tekist að vinna fjórtán risamót.

Federer hafði þrisvar áður tekist að komast í úrslit mótsins en tapaði fyrir Rafael Nadal í öll skiptin.

Andstæðingur Federer í dag var Svíinn Robin Söderling. Hann átti ekki roð í Federer í dag sem vann í þremur settum og kláraði leikinn á innan við tveim tímum.

Federer átti erfitt með að fela tilfinningar sínar eftir sigurinn og grét sigurtárum þegar bikarinn var í hendi og þjóðsöngur Sviss var leikinn.

Það var Andre Agassi sem afhenti Federer bikarinn en hann er síðasti maðurinn sem vann öll fjögur risamótin.