Trapattoni: Þetta verða eins og tveir bikarúrslitaleikir

Landsliðsþjálfarinn Giovanni Trapattoni hjá Írlandi er hvergi banginn þrátt fyrir að Írar hafi ekki verið heppnir með andstæðinga í umspilsleikjum fyrir lokakeppni HM 2010 en þeir mæta Frökkum í tveimur leikjum í nóvember.

Írar enduðu í öðru sæti áttunda riðils undankeppninnar á eftir Ítölum og urðu eitt af fimm liðum undankeppninnar sem töpuðu ekki leik.

„Þetta verða bara eins og tveir bikarúrslitaleikir. Við erum samt fullir sjálfstrausts eftir að hafa farið taplausir í gegnum undanriðilinn.Þrátt fyrir að við séum að fara að mæta liðinu sem komst alla leið í úrslitaleikinn á HM árið 2006 þá höfum við fulla trú á því að við getum náð hagstæðum úrslitum," segir Trapattoni í viðtali á opinberri heimasíðu írska knattspyrnusambandsins.

Fyrri umspilsleikurinn fer fram á Croke Park-leikvanginum í Dyflinni 14. nóvember en seinni leikurinn á Stade de France-leikvanginum í París fjórum dögum síðar.