Verðlaunahöfundi hótað á Facebook

„Ef það eru sautján þúsund gæsir þá eru alltaf tuttugu sem eru leiðinlegar. Sama á við um stigagang í blokk, það eru alltaf einhverjar nornir þar sem eru reiðubúnar að brýna klærnar. Facebook er engin undantekning frá þessum reglum," segir rithöfundurinn Vigdís Grímsdóttir.

Hún, eins og sextíu þúsund aðrir Íslendingar, er skráð sem notandi á Facebook og hefur nýtt sér þennan samskiptavef til gagns og gaman. Nýverið tók gamanið hins vegar heldur að kárna þegar henni fóru að berast hótanir í gegnum einkaskilaboð sem hægt er að senda á Facebook. Og rithöfundurinn ákvað eftir nokkrar slíkar sendingar að taka sér gott frí frá þessu netsamfélagi.

„Ég er ekkert hætt, ég ætla bara ekkert að vera við á næstunni en sný síðan aftur, galvösk, einhvern tímann eftir sumarið," segir Vigdís. Hún vildi ekki gefa upp um hvers konar hótanir væri að ræða. „Nei, ég vil ekki gera þessu fólki það til geðs að hafa eitthvað eftir því sem það skrifaði." Vigdís tilkynnti brotthvarf sitt af Facebook á miðvikudagskvöldið með þessum orðum: „Ég þakka öllum fésbókarvinum mínum fyrir samveruna! Hún hefur verið góð! En þrátt fyrir það get ég ekki liðið hótanir, hvorki í minn garð né vina minna. Guð gefi ykkur öllum góða nótt." Og fékk mikil viðbrögð sem voru öll á sömu lund; hvernig í ósköpunum fólki dytti í hug að senda svona í gegnum Facebook.

Vigdís tekur þessum hótunum af mikilli yfirvegun, segir að hún hafi skemmt sér konunglega inni á Facebook en viðurkennir um leið að þetta hafi komið sér á óvart, að fólk skuli hreinlega hafa fyrir því að senda einhverjum hótanir á Facebook, í samfélagi sem sé fyrst og fremst hugsað til skemmtunar og fræðslu. „Ég bara átta mig ekki alveg á þessu eða hvað býr þarna að baki.

Maður er svo blásaklaus og trúir alltaf því besta upp á fólk. Ég ætla ekkert að hætta þeirri iðju minni, ég var bara búin að fá nóg af þessum hótunum og segi því þetta bara gott í bili."

Vigdís er ekki sú eina sem hefur orðið fyrir barðinu á netníðingum á Facebook. Því nýlega var greint frá því í fjölmiðlum að Ragnheiði Elínu Clausen, fyrrum sjónvarpsþulu, hefði verið hent út af Face­book vegna kvörtunar til yfirmanna Facebook.

Henni var síðan hent út en fékk aldrei neinar skýringar á því. Þá höfðu yfir 450 manns skráð sig á stuðningsmannasíðu Ragnheiðar sem er mætt aftur til leiks á netinu undir réttu nafni; Ragnheiður Elín Hauksdóttir Clausen.