Fékk engin svör frá efnahags- og skattanefnd

Helgi Áss Grétarsson, lögfræðingur, og einn af talsmönnum InDefence hópsins, sagðist í samtali við Vísi hafa lagt fram spurningu til efnahags- og skattanefndar um það hvort einhverjir sérfræðingar í gjaldþrotarétti hafi verið í íslensku samninganefndinni sem samdi um Icesave samninginn. Að auki lagði hann spurninguna fyrir fjárlaganefnd en hann fékk engin svör frá nefndunum.

Helgi innti nefndirnar eftir svörum við því hvort leitað hafi verið til sérfræðinga í gjaldþrotarétti, en svörin voru af skornum skammti. „Ég trúði því þegar frumvarpið var lagt fram að það sem þar stæði væri satt og rétt. Það er hins vegar sérfræðinga í gjaldþrotarétti að túlka þau ákvæði til hlítar," sagði Helgi Áss.

Á hann þar við það ákvæði í samningnum sem áréttar að tryggingasjóðir landanna þriggja sem um ræðir munu njóta jafnræðis þegar kemur að úthlutun úr búi Landsbankans. Það er að segja að Íslendingar, Bretar og Hollendingar fái upp í kröfur sínar í jöfnum hlutföllum en það er í samræmi við þá túlkun á gjaldþrotalögunum sem almennt hefur verið uppi. Ragnar Hall, hæstaréttarlögmaður, og sérfræðingur í gjaldþrotalögum heldur því fram að gjaldþrotalögin hafi almennt ekki verið túlkuð á þennan hátt.

„Þegar menn taka svona stórt lán og fá kröfu í eins stóru þrotabúi og hér um ræðir þarf að teikna alla atburðarás samninganefndarinnar upp að fullu en það hefur ekki verið gert. Það geta verið ótal málsóknir í gangi og það skiptir mjög miklu máli hvenær útgreiðsla til tryggingasjóðs innistæðueigenda fer fram," sagði Helgi Áss Grétarsson að lokum.