Sagan endalausa af Jackson

Óvinnandi vegur er að fara yfir allar fréttir sem tengjast með einum eða öðrum hætti andláti Michaels Jackson. En þó er rétt að tæpa á þeim helstu fyrir eldheita aðdáendur poppguðsins.

Nafnið Jordan Chandler hringir kannski ekki mörgum bjöllum en hann var miðpunkturinn í málaferlunum á hendur Jackson vegna kynferðislegs ofbeldis. Þær fréttir berast nú frá Ameríku að Jordan hafi viðurkennt að hafa sagt ósatt um hvað gerðist milli hans og Jacksons og að maðurinn á bakvið lygarnar sé faðir hans, Evan Chandler. Bloggheimar í Bandaríkjunum hafa logað vegna þessa orðróms og margir hafa heimtað réttlæti handa Jackson. Hins vegar virðist þetta ekki hafa náð eyrum stóru fréttastöðvanna og að öllum líkindum eru þetta að­dáendur Jacksons sem hafa komið þessu af stað í þeim tilgangi að hreinsa mannorð hans. Skríbentar hafa fordæmt þessa tilraun og bent á að Jordan sé fórnarlambið, ekki Michael Jackson.

Af öðrum fréttum tengdum Michael má nefna að fjölskylda hans ætlar ekki að láta grafa hann fyrr en heili hans er kominn á réttan stað. Heili Jacksons var nefnilega fjarlægður svo hægt væri að kryfja hann og komast að dánarorsök og bíður fjölskyldan hans nú eftir niðurstöðunum og líffærinu sjálfu.

Ekki er enn orðið ljóst hvar og hvenær Jackson verður grafinn en hins vegar má geta þess að rúmlega 31 milljón Ameríkana horfði á minningarathöfnina um Jackson sem eru ögn færri en horfðu á jarðarför Díönu prinsessu og innsetningu Baracks Obama í forsetaembættið.

Þá má geta þess að Dr. Arnold Klein viðurkenndi í viðtali við Diane Sawyer að hann væri ekki faðir elstu barna Jacksons, líkt og sumir hafa viljað halda fram. Sögusagnir hafa verið á kreiki um að Klein og Debbie Rowe, meint barnsmóðir Jakcsons, hafi átt í ástarsambandi og að Klein eigi þau Paris og Prince Jackson. En það er víst ekki rétt. „Ekki svo ég viti,“ sagði Klein við Sawyer og bætti því við hann hefði ekki verið yfirheyrður vegna andláts Michaels. „Nei, en hins vegar er það mín skoðun að ef það er rétt að einhver læknir hafi gefið honum verkjalyfið Propofol þá er sá hinn sami glæpamaður. Það lyf er mjög hættulegt og mjög ávanabindandi.“

Að lokum er svo rétt að koma skilaboðum frá Paul McCartney á framfæri sem nú hefur upplýst að hann og Jackson hafi aldrei orðið óvinir heldur hafi þeir bara þroskast hvor í sína áttina. „Og það er engin fótur fyrir þeim sögusögnum að Michael hafi lofað mér því að ég fengi höfundarréttinn að bítlalögunum í arf, það er algjör vitleysa. Og ég get því ekki verið svekktur ef ég fæ ekki lögin.“