Veitir kynlífsráðgjöf í Elle

Kynlífsfræðingurinn Yvonne Kristín Fulbright var nýverið álitsgjafi á heimasíðu hins virta tímarits Elle varðandi kynlífsmyndbönd og nektarljósmyndir fræga fólksins í Hollywood.

Mikill fjöldi slíkra myndbanda og ljósmynda hefur litið dagsins ljós undanfarin ár með aukinni net- og farsímanotkun þar sem stjörnur á borð við Paris Hilton, bresku fyrirsætuna Jordan og Vanessu Hudgens úr High School Musical sjást fækka fötum. Oft eru það fyrrverandi kærastar eða kærustur sem setja efnið á netið, stjörnunum til lítillar gleði.

Yvonne Kristín, sem á íslenska móður og bandarískan föður, er eftirsóttur kynlífsráðgjafi í Bandaríkjunum. Hún skrifar kynlífsdálka fyrir Foxnews.com, hefur verið álitsgjafi fyrir tímaritið Cosmopolitan og gefið út bækur um kynlíf. Í greininni í Elle segir hún að margar ungar stjörnur átti sig ekki á því að fyrrverandi ástfólk þeirra geti notfært sér sambandið í gróðaskyni. Hún segir að stjörnurnar þurfi samt ekkert endilega að biðjast afsökunar á hegðun sinni. „Það er ekkert rangt við nakinn líkama og að nota hann til að krydda ástarsambandið. Erótískar ljósmyndir og myndbönd sem eru tekin upp á símann eru nýjasta aðferðin til að reyna að hrífa einhvern," segir Yvonne. Hún leggur áherslu á mikilvægi þess að manni líði vel í sambandinu og treysti hinum aðilanum fullkomlega.

„Fyrrverandi kærastar eða kærustur geta verið grimm þegar hlutirnir ganga ekki upp og þá skiptir engu máli hvort þau hafi verið saman í ellefu vikur eða ellefu ár. Stjörnurnar verða að vega og meta hvort áhættan sem af svona myndefni stafar sé þess virði."

freyr@frettabladid.is