Arnarungar sem komust á legg í sumar voru 36 og hafa þeir ekki verið fleiri í manna minnum. Íslenski hafarnarstofninn telur nú um 65 pör og urpu 45 þeirra í vor. Varp misfórst hjá 19, þar á meðal hjá parinu sem fylgst var með á vefmyndavél Arnarsetursins.
„Þetta er búið að vera mjög gott ár, ekkert flóknara en það,“ segir Jón Gunnar Ottósson, forstjóri Náttúrufræðistofnunar Íslands. Um ástæður þess að stofninn hafi stækkað segir hann að til dæmis sé minna um skaðsemi af mannavöldum.
„Við vöktum arnarstofninn á hverjum ári og fylgjumst vel með varpi,“ segir Jón Gunnar sem segir að Náttúrufræðistofnun viti vel hvar sé verið að sækja á örninn og hafi gert ráðstafanir vegna þessa á undanförnum árum.
Varpsvæði arna nær nú frá Faxaflóa og vestur og norður um í Húnaflóa. Áður urpu ernir um land allt og var stofninn þá tvisvar til þrisvar sinnum stærri en í dag. Fækkun hófst í kjölfar ofsókna og eitrunar á 19. öld og urðu pörin fæst um 20 í kringum 1960. Nú hafa arnarpör sést í Árnessýslu en þar er ekki viðvarandi varp, að sögn Jóns Gunnars.
Náttúrufræðistofnun Íslands fylgist með arnarstofninum í samvinnu við Fuglaverndarfélag Íslands og Náttúrustofurnar í Stykkishólmi og Bolungarvík.- vsp
