Trembling: Eriksson ekki að taka við landsliði N-Kóreu

Sögusagnir í breskum fjölmiðlum í dag herma að knattspyrnusamband Norður-Kóreu sé búið að setja sig í samband við Sven Göran-Eriksson, yfirmann knattspyrnumála hjá enska d-deildarfélaginu Notts County, um möguleikann á því að hann taki að sér þjálfun liðsins.

Landslið Norður-Kóreu er þegar búið að vinna sér þátttökurétt á lokakeppni HM 2010 en stjórnarformaður Notts County hefur hins vegar vísað sögusögnunum á bug.

„Ég vill koma því á framfæri að Sven er ekki á förum og hann einbeitir sér bara á vinnu sinni fyrir Notts County. Félagið hefur ekki fengið beiðni frá knattspyrnusambandi Norður-Kóreu um að fá að tala við hann," segir Peter Trembling, stjórnarformaður Notts County, í viðtali á opinberri heimasíðu félagsins.

Eriksson var sem kunnugt er landsliðsþjálfari Englands á sínum tíma en síðast var hann landsliðsþjálfari Mexíkó. Hann hefur einnig verið reglulega orðaður við landsliðsþjálfarastöðuna hjá Svíþjóð.