Pato ósáttur við markið sem var dæmt af

Brasilíumaðurinn magnaði, Alexandre Pato, skoraði fullkomlega löglegt mark gegn Real Madrid í kvöld sem var dæmt af. Gjörsamlega glórulaus dómur enda var Pato svekktur í leikslok.

„Ég var mjög ánægður þegar ég sá boltann fara inn því ég var viss um að hafa skorað löglegt mark," sagði Pato eftir leikinn.

„Ég snerti boltann aldrei með hendinni heldur stýrði ég honum með öxlinni. Mig langaði svakalega mikið til þess að skora og vinna í kvöld. Ég gerði það en dómarinn tók af mér löglegt mark.

„Ég er samt nokkuð sáttur með úrslitin því við erum í fínni stöðu í riðlinum. Þetta eru samt svo sérstakir leikir að það er svekkjandi þegar dómarinn tekur af manni löglegt mark."