Suarez: Við munum vinna Argentínu og komast á HM

Framherjinn Luis Suarez hjá Úrúgvæ er fullur sjálfstrausts fyrir sannkallaðann úrslitaleik við Argentínu í undankeppni HM 2010 í Suður-Ameríku.

Sigurliðið tryggir sér fjórða sæti riðilsins og þar með farseðilinn á lokakeppnina. Jafntefli gæti hins vegar nægt Argentínu til þess að komast til Suður-Afríku næsta sumar.

„Við munum vinna Argentínu og komast á HM. Við vitum að þrjú stig eru það sem við þurfum til þess að komast á lokakeppnina og það er það eina sem við hugsum um.

Við berum virðingu fyrir mótherjum okkar en treystum einnig á sjálfa okkur og við vitum að við höfum það sem við þurfum til þess að vinna leikinn. Þetta verður annars skemmtileg viðureign enda mikið í húfi fyrir bæði lið og það verða því miklar tilfinningar í þessu," segir Suarez en leikurinn er einmitt í beinni útsendingu á Stöð 2 Sport í kvöld kl. 22.