Ég drap mömmu

Nú er ákveðið að opnunarmynd Alþjóðlegrar kvikmyndahátíðar í Reykjavík 2009 verði kanadíska verðlaunamyndin „Ég drap mömmu mína“ eða J‘ai Tué Ma Mère. Xavier Dolan leikstýrir, framleiðir, skrifar handritið og leikur aðalhlutverkið í þessari mynd. Hann er aðeins tvítugur og þykir óvenjulega hæfileikaríkur. Myndin er byggð á hans eigin ævi og fjallar um samband samkynhneigðs unglings, Huberts, við móður sína, Chantale. Xavier er fæddur 1989. Hann hóf ungur að leika. Ég drap mömmu er fyrsta mynd hans en hún vakti feiknarlega athygli í Cannes í vor, hlaut fyrstu verðlaun í Director’s Fortnight-flokknum. Sýning á Riff er frumsýning á Norðurlöndum.

Fleiri kanadískar myndir verða á dagskrá Riff dagana 17.-27.september: í Antoine eftir Laura Bari er skyggnst inn í líf Antoines, fimm ára, sem stýrir útvarpsþætti, sinnir leynilögreglustörfum og keyrir bíl. Antoine er af víetnömskum uppruna og fæddist hundrað dögum fyrir tímann. Antoine er blindur.

Skjannabirta: Þegar andi og efni mætast, eftir Velcrow Ripper. Hvað er Darryl Hannah að gera uppi í tré? Hún er trjáfaðmari og stolt af því að vernda umhverfið, stolt af því að gera það sem henni dettur í hug. Og hún er aðeins ein af mörgum sem gera það í þessari mynd, ásamt Danny Glover, Desmond Tutu og öðru minna þekktu baráttufólki.

Mamma er hjá hárgreiðslumanninum, eftir Léa Pool. Sumarið 1966 var tími til þess að njóta sumarfrís og frelsis. En Élise sér uppnámið sem brotthvarf móðurinnar veldur í fjölskyldunni. Élise ákveður því að taka málin í eigin hendur.

Stolið: manifestó rímixarans, er eftir Brett Gaylor. Ef þú ert internet-aktívisti á borð við Brett Gaylor gerirðu bíómynd sem er ólögleg. Listamaðurinn GirlTalk blandar saman annarra manna lögum til að búa til sína eigin tónlist, í trássi við gildandi höfundarréttarlög. Tónlist GirlTalk er eitt af mörgum dæmum sem bregða gagnrýnu ljósi á höfundarrétt, sem stangast á við lögmál internetsins.

Þetta eru þær fjórar myndir sem í boði verða á Riff frá Kanada en hátíðin hefst 17. september. Sjá nánar www.riff.is. - pbb