Vonast til að ná sáttum við þjóðina

Jóhanna Sigurðardóttir sagðist eftir fund sinn með forseta Íslands á Bessastöðum þakka það traust og trúnað sem henni er sýnt með því að fá umboð til myndunar nýrrar ríkisstjórnar. Hún sagði minnihlutastjórn Samfylkingar og Vinstri grænna með stuðningi Framsóknarflokksins nú vera á lokastigi en verkáætlun tveggja fyrrnefndu flokkanna er tilbúin. Hún sagði því ekkert því til fyrirstöðu að mynda þessa ríkisstjórn og kynna ráðherra hennar fyrir forseta Íslands. Það mun hún gera á ríkisráðsfundi klukkan 18:00 í dag.

Jóhanna sagði að umrædd verkáætlun sem nú lægi fyrir væri þannig uppbyggð að hún gæti orðið til þess að draga úr þeirri sundrung og upplausn sem verið hefur í samfélaginu á undanförnum vikum og mánuðum. Hún sé leið til sátta við þjóðina og mikilvæg í þeim verkum sem framundan eru.

„Ég vil einnig þakka það traust sem formenn Samfylkingarinnar og Vinstri grænna sýna mér með því að leiða þessa ríkisstjórn. Verkefnið sem nú er framundan er fyrst og fremst það að reisa við atvinnuvegina og slá skjaldborg um heimilin í landinu. Ég vona að þessi ríkisstjórn verði farsæl þannig að hún geti leitt þjóðina út úr þeim ógöngum sem við erum í á þessum erfiðustu tímum sem þjóðin hefur upplifað í marga áratugi," sagði Jóhanna á Bessastöðum.

„Verkefnið er einnig að endurreisa hér íslensk efnahagslíf eins og við getum á þeim stutta tíma sem við höfum," sagði Jóhanna og bætti við að nauðsynlegt væri að koma á nýjum gildum í samfélaginu.

Hún sagðist nú halda á þingflokksfund Samfylkingar og strax að honum loknum verður haldinn flokksráðsfundur flokksins. Síðan verður haldinn blaðamannafundur klukkan 16:00.

„Ég mun síðan mæta með ráðherraefni mín hingað síðar í dag eða kvöld."