Seðlabankastjórarnir svara „fyrr en seinna“

Bankastjórar Seðlabankans ætla að svara Jóhönnu Sigurðardóttur forsætisráðherra því „fyrr en seinna“ hvort þeir munu fara að tilmælum hennar um að víkja úr stjórn Seðlabankans, að sögn Ingimundar Friðrikssonar bankastjóra. Bankastjórarnir þrír funduðu um málið í gærkvöldi, en gáfu ekkert svar þótt frestur sem ráðherra gaf þeim til að svara hefði runnið út í gær.

Það sem skýrir töfina, að sögn Ingimundar, er að Davíð Oddsson, formaður stjórnarinnar, hefur verið í vinnuferð í London og kom ekki til landsins fyrr en um fimmleytið í gær. Hann vildi ekki tjá sig við blaðamann í Leifsstöð og svaraði stuttaralega „nei“ þegar hann var beðinn um viðtal. Hann hélt síðan til fundar við Ingimund og Eirík Guðnason, hina bankastjórana tvo, í gærkvöldi.

„Við gerðum ráðuneytinu viðvart undir kvöld að svar kæmi ekki í kvöld [gærkvöld] og því var vel tekið þar,“ segir Ingimundur.

Jóhanna Sigurðardóttir vildi ekki tjá Fréttablaðinu viðbrögð sín við ákvörðun bankastjóranna í gær. Samkvæmt heimildum Fréttablaðsins var ekki rætt við hana beint, heldur barst tilkynning bankastjóranna til ráðuneytisstjóra forsætisráðuneytisins. Þeir munu ekki hafa farið fram á lengri frest til að svara, einungis tilkynnt að svar myndi ekki berast í tíma.

Spurður hvenær svars er að vænta segir Ingimundur: „Ég get ekki sagt um það. Það verður fyrr en seinna.“ Hann segist heldur ekkert geta sagt um það hvort niðurstaða náðist um málið á fundi þeirra. „Ráðherranum verða kynnt viðbrögðin fyrst,“ segir hann.

Í frumvarpinu um Seðlabankann, sem ríkisstjórnin hefur lagt fram á Alþingi og verður tekið til umræðu í dag, er kveðið á um að forsætisráðherra skipi seðlabankastjóra til sjö ára í senn að undangenginni auglýsingu. Seðlabankastjóri skal hafa lokið meistaraprófi í hagfræði og búa yfir víðtækri reynslu og þekkingu á peningamálum. Ekki er heimilt að skipa sama mann seðlabankastjóra oftar en tvisvar sinnum. Forfallist hinsvegar seðlabankastjóri getur forsætisráðherra sett annan mann tímabundið í embættið.