Allavega tuttugu ár í viðbót

„Þegar Andrea Jóns hættir að fara veit ég að ég á tuttugu ár eftir,“ segir Ólafur Páll Gunnarsson, útvarpsmaður á Rás 2, spurður hvort hann sé ekkert að verða of gamall fyrir Hróarskelduhátíðina í Danmörku.

Óli Palli hefur sótt hátíðina á hverju ári síðan 1996, sem þýðir að hátíðin í ár er sú fjórtánda í röðinni. Hann var nýkominn á hátíðarsvæðið í gær ásamt Andreu í blíðskaparveðri þegar Fréttablaðið hafði samband við hann.Hlakkaði hann mikið til að sjá Hjaltalín sem átti að stíga á svið síðar um kvöldið. Einnig var hann spenntur fyrir deginum í dag þegar sveitir á borð við Oasis og Nick Cave and the Bad Seeds stíga á svið. Útvarpað verður beint frá hátíðinni í Rokklandi Óla Palla á Rás 2 á sunnudaginn og á hann vafalítið eftir að reyna að ná tali af einhverjum frægum hljómsveitum. „Það er ekkert planað, þannig lagað. Þetta er svolítið eins og að fara á grásleppu. Stundum fær maður eitthvað og stundum ekki en ég ætla að reyna að hitta Fleet Foxes og Glasvegas.“

Um tvö hundruð Íslendingar sækja Hróars­kelduhátíðina í ár, sem er mikil fækkun frá því sem verið hefur. „Ég held að það sé kringum einn tíunda af því sem það var fyrir tveimur árum,“ segir Óli.