Everton reynir að fá argentískan landsliðsmann

Forráðamenn Everton vinna nú hörðum höndum á leikmannamarkaðnum en samkvæmt breskum fjölmiðlum hefur félagið áhuga á að fá argentínska vængmanninn Ever Banega á láni út yfirstandandi keppnistímabil frá Valencia ásamt möguleikanum á því að kaupa leikmanninn að lánstímanum loknum.

Banega hefur ekki náð að festa sig í sessi hjá Valencia eftir 15 milljón punda félagsskipti hans á Mestalla-leikvanginn fyrir 18 mánuðum síðan og var til að mynda á láni hjá Atletico Madrid á síðasta keppnistímabili.

Everton gæti þó lent í vandræðum með að fá atvinnuleyfi fyrir Banega þar sem hann hefur ekki leikið 75% af landsleikjum Argentínu síðustu tvö ár.

Everton ætlaði einmitt að gera svipaðan samning við Inter vegna Victor Obinna síðasta sumar en það dæmi féll upp fyrir eftir að Nígeríumanninum var neitað um atvinnuleyfi á Englandi.