Leikmennirnir vilja Hiddink áfram

John Terry, fyrirliði Chelsea, segir að leikmenn liðsins vilji hafa Guus Hiddink áfram við stjórnvölin hjá félaginu.

Terry telur að viðræður á milli Hiddink og eigandans Roman Abramovich séu í gangi, um að Hollendingurinn haldi áfram að stýra Chelsea. Sem stendur er hann aðeins með samning út tímabilið, en hann er einnig á samningi hjá rússneska knattspyrnusambandinu.

„Það gengur mjög vel hjá okkur og ég er viss um að viðræður séu í gangi. Ef við höldum áfram að bæta okkur er eiginlega bara einn kostur í stöðunni," sagði Terry og bætti við að Jose Mourinho væri ekki í fyrsta sæti hjá leikmönnunum til að stýra liðinu á næstu leiktíð, heldur Hiddink.

„Hann hefur verið frábær. Hann sýnir okkur mikið aðhald og enginn kemst upp með neitt á æfingum," sagði fyrirliðinn.