Ferguson fær peninga til að versla

Sir Alex Ferguson, stjóri Man. Utd, hefur fengið græna ljósið frá eigendum félagsins, Glazer-fjölskyldunni, og getur látið til sín taka á leikmannamarkaðnum í sumar.

United þarf að fylla skarð Cristiano Ronaldo sem er á leið til Real Madrid. Félagið hefur verið orðað við fjölda leikmanna í sumar og þar á meðal Franck Ribery, Karim Benzema og Antonio Valencia.

Margir stuðningsmanna United hafa óttast að peningarnir sem félagið fær fyrir Ronaldo verði ekki notaðir til að styrkja leikmannahópinn.

Í yfirlýsingu frá talsmanni Glazer-fjölskyldunnar kemur fram að eigendurnir hafi alltaf stutt Ferguson við uppbyggingu liðsins og á því verði engin breyting.