Buff leikur lög Magga Eiríks

Hljómsveitin Buff er þessa dagana að taka upp plötu með sínum útgáfum af vinsælustu lögum Magga Eiríks. Tilefnið er útgáfa nýrrar ævisögu um kappann.

„Það var haft samband við okkur og spurt hvort við hefðum áhuga. Við höfðum það svo sannarlega þar sem við erum allir miklir aðdáendur Magga,“ segir Hannes Friðbjarnarson, trommari Buffsins. „Okkur fannst gríðarlegur heiður að vera boðið þetta, líka því Maggi hefur sínar skoðanir á hlutunum. Hann var mjög hrifinn af því að við myndum taka þetta í okkar hendur og við fengum þau skilaboð að við mættum gera það sem okkur sýnist.“

Buff sér um allan undirleik á plötunni og söngurinn er að mestu í höndum sveitarinnar. Maggi syngur þó í einhverjum lögum og tekur jafnframt virkan þátt í verkefninu. Við undirbúning plötunnar söng Maggi inn sín vinsælustu lög á kassagítarinn og í framhaldinu ákvað Buffið hvernig lögin yrðu útsett. Þar má telja gimsteina á borð við Ó þú, Reyndu aftur, Samferða, Gleðibankinn og Hin eina sanna ást, sem Björgvin Halldórsson söng í myndinni Óðal feðranna.

„Hugmyndin er að þessi plata fylgi bókinni,“ segir Maggi Eiríks. „Það var annað hvort að gera þetta með „orginal“ upptökurnar eða gera eitthvað aðeins öðruvísi. Mér datt í hug að það væri sniðugt að fá unga og hrausta menn til að koma með nýtt sjónarhorn á þessi lög,“ segir hann. „Þessi lög eru mörg börn síns tíma en það breytir ekki því að menn hafa mismunandi aðkomu að svona efni. Ég vona bara að þeir fari sem lengst frá „orginalnum.“

Upptökur hófust í síðustu viku í hljóðveri í íbúð eins meðlims Buffsins á Laugaveginum sem var sérstaklega búið til fyrir þetta verkefni. Platan, sem hefur fengið vinnuheitið Lag og texti - Magnús Eiríksson, er væntanleg í október, sama dag og bókin kemur út hjá útgáfufyrirtækinu Sögur. Plötunni verður fylgt eftir með tónleikaferð um landið þar sem Buff, Maggi og hljómsveit hans Mannkorn leika listir sínar.

freyr@frettabladid.is