Fabregas: Ég talaði við forseta Real Madrid

Cesc Fabregas, ein aðalstjarna enska úrvalsdeildarliðsins Arsenal, viðurkenndi í spænska blaðinu El Mundo, að hann hafi á dögunum rætt við Ramon Calderon, forseta Real Madrid í síma.

Það hefur margt breyst síðan að Cesc Fabregas yfirgaf unglingalið Barcelona og kom til Arsenal þar sem hann hefur blómstrað og orðið einn af bestu miðjumönnum í Evrópu. Hann tók við fyrirliðabandinu hjá Arsenal fyrr í vetur.

„Það er rétt að forseti Real Madrid hringdi í mig og við töluðum saman í síma. Ég lofaði honum aldrei að ég ætlaði að semja við Real og hann var bara að kanna stöðuna á mér," sagði Fabregas sem hefur glímt við erfið meiðsli í vetur. Hann meiddist á hné í leik á móti Liverpool og hefur verið frá í nokkra mánuði.

„Ég hef ekki gefið neinum liðum undir fótinn að ég ætli að semja við þau. Það sama á að gilda um alla sem koma fram fyrir mína hönd. Ég stend við mitt og ég hef aldrei gefið neitt í skyn um að ég ætli að yfirgefa Arsenal," sagði Cesc Fabregas í umræddu viðtali við El Mundo.

„Það er mikill heiður að vita að því að tvö af stærstu fótboltaliðum heims hafi áhuga á manni en ég er leikmaður Arsenal og er með samning við félagið til ársins 2014," sagði Fabregas en auk áhuga frá Real Madrid þá vilja forráðamenn Barcelona ólmir fá spænska landsliðsmanninn aftur til sín.