Segir lögreglu geta sent sér reikninginn

Verslunarmaður á Akureyri sem laug að fréttavef Morgunblaðsins í gær að ísbjörn væri við Hofsós segir um meinlausan hrekk hafa verið að ræða sem flestir hafi tekið vel. Hann segir lögreglu geta sent sér reikninginn ef einhver kostnaður hlaust af athæfinu.

Frétt um ísbjörninn ásamt ljósmyndum birtist á fréttavef Morgunblaðsins síðdegis í gær. Fjöldi fólks hafði í framhaldinu samband við lögregluna á Sauðárkróki sem ákvað að ræsa strax út mannskap. Tveir lögregluþjónar lögðu strax áleiðis á staðinn þar sem ísbjörninn átti að vera, auk þess sem skyttur voru kallaðar út.

Um hálftíma eftir að fréttin birtist kom í ljóst að um gabb hafi verið að ræða. Sigurður Guðmundsson, verslunarmaður á Akureyri, stóð á bakvið gabbið en hann var á í skemmtiferð um Skagafjörð ásamt þrjátíu Oddfellowmönnum. Sigurður segir um saklaust grín hafa verið að ræða og ef lögregla hafi orðið fyrir kostnaði vegna þess þá geti hún sent sér reikninginn.

Lögreglan sagði í gær að fólk á svæðinu hafi haft nokkrar áhyggjur eftir að fréttir af ísbirninum bárust. Sigurður segir ísbjarnafréttir hafa verið tíðar á síðasta ári og ef menn hafi ekki húmor fyrir þessu þá verði að hafa það.

Sigurður segir að félagar sínir í Oddfellow sem voru með honum í ferðinni hafi ekki vitað af hrekknum.