Calzaghe dæmdar 325 milljónir

Hnefaleikarinn Joe Calzaghe vann í dag mál sem hann höfðaði gegn fyrrum umboðsmanni sínum Frank Warren.

Calzaghe lagði hanskana á hilluna í síðasta mánuði og hann hélt því fram að umboðsmaður hans fyrrverandi skuldaði honum 325 milljónir króna.

Warren hélt því hinsvegar fram að það væri Calzaghe sem skuldaði sér rúmlega 150 milljónir og því fór deila þeirra alla leið fyrir dóm.

Warren var umboðsmaður Walesverjans í tíu ár frá árinu 1997 en Calzaghe sá sjálfur um að kynna síðustu bardaga sína á ferlinum.

Calzaghe er 36 ára gamall og vann sigra í öllum 46 bardögum sínum á ferlinum. Þar af var hann heimsmeistari óslitið síðustu ellefu ár ferilsins.