Owen vill vera áfram í ensku úrvalsdeildinni

Umboðsskrifstofan Wasserman Media Group sem hefur meðal annarra Michael Owen á sínum snærum hefur sent flestum toppliðunum í enska boltanum skýrslu þar sem færð eru rök fyrir því hvernig framherjinn geti nýst viðkomandi félagi.

Hinn 29 ára gamli Owen er orðinn samningslaus hjá Newcastle og hefur áhuga á að spila í úrvalsdeildinni á næstu leiktíð.

„Við notum oft skýrslur eða myndbönd til þess að undirstrika styrkleika skjólstæðinga okkar fyrir forráðamönnum félaga," segir Sam Rush stjórnarformaður umboðsskrifstofunar en skýrslan um Owen er sögð vera 34 síður.

Rush segir Owen þegar hafa fengið tilboð en sé enn að bíða eftir rétta tækifærinu.

„Það hafa komið fyrirspurnir í Owen frá félögum utan Englands en hann hefur sagt okkur að hann vilji leika áfram í ensku úrvalsdeildinni," segir Rush.