Given ósáttur við FIFA

Írski landsliðsmarkvörðurinn Shay Given er afar ósáttur við það kerfi sem FIFA notaði þegar dregið var í umspilinu um laust sæti á HM í dag.

Sterkari liðin voru sett í sérpott og þau veikari í annan. Sterkustu liðin gátu því aldrei mæst. Það segir Given að sé ósanngjarnt.

„Þetta er virkilega ósanngjarnt kerfi. Við erum eitt af minni liðunum og það var nógu erfitt að komast í þennan pott fyrir. Að breyta síðan þessum reglum tveim vikum áður en keppni lýkur er glórulaust," sagði Given reiður en hann hefði líklega frekar viljað mæta Slóveníu en Frakklandi.

„Við fórum til Bari og Búlgaríu og náðum góðum úrslitum. Það er trú í hópnum að við getum mætt þessum stóru þjóðum og náð í hagstæð úrslit. Við hefðum átt að vinna Ítalíu um daginn en verðum að læra af þeim leik," sagði Given en rimma Íra og Frakka er sú langáhugaverðasta í umspilinu.