Marel samdi við Val

Marel Jóhann Baldvinsson hefur skrifað undir samning við Val út sumarið 2009. Marel kemur til Valsmanna frá uppeldisfélagi sínu, Breiðablik.

Marel hafði ekkert æft með Breiðabliki síðustu vikur en Blikar hafa ekki getað staðið við launagreiðslur eftir því sem heimildir Vísis herma.

Valsmenn voru fljótir til og hafa nú tryggt sér þjónustu framherjans sterka.

„Við erum búnir að ná samkomulagi við Blika og Marel skrifar undir samning út þessa leiktíð," sagði Börkur Edvardsson, formaður knattspyrnudeildar Vals.

Hann vildi ekki gefa upp hvort eða þá hversu mikið félagið hefði greitt fyrir Marel. Valur hefði náð samkomulagi við Breiðablik og menn mættu lesa það út úr því sem þeim sýndist.

Þar sem Blikar höfðu ekki efni á að borga Marel laun vaknar sú spurning hvort hann sé dýr leikmaður.

„Þetta snýst ekki um peninga. Það er árið 2009. Þetta snýst um að við erum að fá góðan mann sem er að koma til góðs félags," sagði Börkur.

Valsmenn hafa heldur betur verið duglegir að safna liði í vetur en fyrir utan Marel eru einnig komnir til félagsins Reynir Leósson, Ian Jeffs, Ólafur Páll Snorrason, Kristján Hauksson, Viktor Unnar Illugason, Haraldur Björnsson, Pétur Georg Markan og Guðmundur Viðar Mete