Birgitta kemur Lilju til varnar

„Hvað átti hún að gera annað, átti hún að rjúfa meirihlutann? Það er rosalega erfitt að standa einn í svona stappi miðað við pressuna undanfarið," segi Birgitta Jónsdóttir, þingflokksformaður Borgarahreyfingarinnar, í samtali við fréttastofu.

Hún kemur stjórnarþingmanninum Lilju Mósesdóttir til varnar í athugasemd á vefritinu Eyjunni, þar sem hún hafði verið gagnrýnd fyrir að víkja sæti í umræðum um Icesave frumvarpið í efnahags- og skattanefnd, frekar en að kjósa gegn áliti nefndarinnar.

Birgitta segir Lilju hafa verið stillt upp við vegg í málinu og telur að hún hafi ekki átt annarra kosta völ en að víkja sæti. Annars hefði hún annaðhvort þurft að skrifa upp á meirihlutaálitið og þar með fórna því að kjósa gegn málinu í þinginu, eða kljúfa ríkisstjórnina ella.

Birgitta segir raunverulega vandann vera að finna í vinnubrögðum fastanefnda þingsins og segir skandal hvernig mál séu þvinguð í gegn þar án nauðsynlegrar umræðu.

„Það er alltaf verið að tala um að finna þverpólitíska sátt í þessum stórum málum. Nú geta stjórnarliðar ekki einu sinni komið sér saman um hlutina," segir Birgitta og segir tími kominn til að menn hætti að þvinga fólk til að fylgja flokkslínum.

„Þetta er engin samvinna, þetta er bara leiksýning."

Birgitta segir ljóst að væri hún nefndarformaður væru vinnubrögðin öðruvísi og meiri samvinna og umræður í nefndastarfinu.