Beita húsdýrum á hringtorgin

Náttúruvernd Ísafjarðarbær mun gera tilraun með að beita húsdýrum á lítið notuð græn svæði í bænum næsta sumar. Ralf Trylla, umhverfisfulltrúi Ísafjarðarbæjar, segir mögulegt að lækka kostnað við slátt, auk þess sem húsdýrin séu á allan hátt umhverfisvænni en sláttuvélarnar.

„Einhver þarf að slá grasið, og dýrin gera það vistvænt og fyrir lítið fé, og svo bera þau auðvitað sjálf á blettinn,“ segir Ralf. Hann segir að líklega verði það einkum kindur og hestar sem verði fyrir valinu. Svæðin sem þau fái til beitar verði væntanlega girt af tímabundið með rafmagnsgirðingum.

Í raun er hægt að prófa þessa aðferð á flestum svæðum sem eru notuð lítið eða óreglulega, allt frá opnum svæðum í útjaðri bæjarins til hringtorga, segir Ralf. Þó sé sérstaklega áhugavert að beita kindum á svæði þar sem kerfill sé til vandræða, enda sé jurtin skæða ekki til vandræða á túnum þar sem kindur gangi lausar.

Ekki spillir fyrir að dýrin gætu orðið vinsæl hjá fjölskyldum í gönguferð, segir Ralf. Í framhaldinu mætti skoða kerfi þar sem lóðaeigendur geti leigt kind eða kindur til að sleppa við að slá blettinn. Eftir er að skoða ýmsa þætti, til dæmis hvernig brugðist verði við sleppi dýrin úr girðingu, hversu mörg dýr þurfi á hvert tún og í hversu langan tíma. - bj