Framtíð stjórnarinnar gæti ráðist af atkvæði Þráins

Icesave frumvarp ríkisstjórnarinnar var samþykkt með naumum meirihluta eftir aðra umræðu á Alþingi í dag en tveir stjórnarþingmenn greiddu atkvæði gegn frumvarpinu. Framtíð frumvarpsins og jafnvel ríkisstjórnarinnar gæti ráðist af atkvæði Þráins Bertelssonar, því einn stjórnarþingmaður til viðbótar gæti lagst gegn frumvarpinu við lokaafgreiðslu þess.

Einni sögulegustu atkvæðagreiðsla í sögu Alþingis lauk í dag. Tveir stjórnarliðar greiddu atkvæði gegn frumvarpi ríkisstjórnarinnar og sá þriðji gaf í skyn að hann gæti allt eins gert það við þriðju umræðuna.

„Óvissan um skuldaþol þjóðarbúsins en ekki áhugi á stundarávinning gerir það að verkum að ég segi nei við ríkisábyrgð á Icesave," sagði Lilja Mósesdóttir, þingmaður VG, í umræðum á þingi í dag.

Þessi afstaða Lilju kom ekki alveg á óvart miðað við fyrri yfirlýsingar en margir höfðu búist við að Ögmundur Jónasson myndi láta nægja að sitja hjá en það gerði hann ekki.

„Með atkvæði mínu gegn Icesave samningunum mótmæli ég niðurstöðunni eins og hún liggur fyrir svo og hvernig hún er fengin. Ég segi nei," sagði Ögmundur.

Eins og hjón sem rífast á meðan jólatréð brennur

Enn eitt atkvæði var því fallið frá ríkisstjórninni. En þá kom stjórnarandstæðingur ríkisstjórninni til aðstoðar og stjórn og stjórnarandstöðu var líkt við foreldra sem rifust í lokuðu í herbergi um efnahagslega stöðu heimilisins.

„Kenna hvort öðru um og greinir á um leiðir til úrbóta meðan að jólatréð í stofunni stendur í björtu báli," sagði Þráinn Bertelsson, þingmaður utan flokka. Hann greiddi atkvæði með frumvarpinu.

Ásmundur Einar Daðason, þingmaður VG, hefur lýst efasemdum um Icesave frumvarpið og bindur vonir um breytingar á málinu fram að þriðju umræðu. „Eins og staðan er núna styð ég það að málið gangi til fjárlaganefndar en ítreka það að væntanleg afstaða mín til málsins mun ráðast af því hvernig vinnu nefndarinnar er háttað."

„Hvað á að taka við ef þessi ríkisstjórn fellur?"

Aðalgrein frumvarpsins var samþykkt með 32 atkvæðum gegn 29 en tveir þingmenn voru fjarverandi. Ef Ásmundur snýst gegn frumvarpinu við þriðju og lokaumræðu málsins þarf ríkisstjórnin á atkvæði Þráins Bertelssonar að halda, annars er málið fallið á Alþingi og ef til vill ríkisstjórnin líka.

„Það væri auðvitað mjög snúin staða fyrir ríkisstjórnina ef að þetta mál félli," sagði Jóhanna Sigurðardóttir, forsætisráðherra, í samtali við fréttastofu. „Ég ætla ekki að gefa mér fyrirfram að þessi ríkisstjórn gefi upp öndina. Eigum við ekki að vona að hún lifi áfram vegna þess að ég spyr þjóðina, hvað á að taka við ef þessi ríkisstjórn fellur," sagði Jóhanna.