Indverskir kvikmyndagerðarmenn flykkjast til Íslands

„Þetta fólk er miklar stjörnur í sínu heimalandi. En er algjörlega laust við stjörnustæla," segir Elísabet Agnarsdóttir hjá Jöklum ehf. en hún hefur vart undan að taka við fyrirspurnum frá indverskum kvikmyndagerðarmönnum sem vilja ólmir koma til landsins og taka upp efni fyrir kvikmyndir sínar.

Á landinu er nú staddur nokkuð stór hópur frá Tollywood til að taka tónlistarmyndbönd fyrir kvikmyndina Namo Venkatesa í leikstjórn Srinus Vytla. Sem sagt hvorki Bollywood - sem er hvað frægast - né Kollywood en tökulið frá því héraði var statt hér á landi fyrir skemmstu eins og Fréttablaðið greindi frá.

Tollywood er gælunafn yfir kvikmyndir frá Andhra Pradesh-héraðinu á Indlandi. Þar er töluð sérstök mállýska sem heitir Telegu og Tollywood dregur nafn sitt af. Tollywood á nokkur heimsmet í heimsmetabók Guinness, þar eru meðal annars framleiddar flestar kvikmyndir í heiminum á ári hverju og þar býr einnig sá leikari sem hefur leikið í flestum kvikmyndum í öllum heiminum eða alls 750. Þar er einnig stærsta kvikmyndaver í heimi og í Andhra Pradesh eru flest kvikmyndahús á Indlandi ef marka má wikipediu.

Og hér á landi eru sem sagt tvær af skærustu stjörnum Tollywood; Venkatesh Daggubati, sem er margverðlaunaður leikari og nýtur mikillar hylli í Tollywood-kvikmyndageiranum, og svo Trisha Krishnan, einhver helsta þokkadís þessarar kvikmyndagerðar en móðir hennar er með í för og passar upp á að allt sé örugglega með felldu. Hópurinn frá Tollywood, sem er um tuttugu manns, hefur verið hér í heila viku og tekið upp efni fyrir tvö myndbönd við Skógafoss, Seljalandsfoss, Reynisdranga og Jökulsárlón, svo fátt eitt sé nefnt. Þau hafa reyndar verið á ferðalagi um alla Evrópu síðustu tuttugu daga til að taka upp borgarsenur fyrir myndina en Ísland leikur síðan aðalhlutverkið í tónlistarmyndböndunum.

Elísabet segir að vinnulagið sé ekkert öðruvísi en það sem viðhaft var þegar Kollywood-liðið var hér á landi. Unnið sé frá morgni til kvölds. Reyndar gekk ekki allt eins og í sögu því tollurinn hleypti ekki öllum töskum Tollywood-fólksins í gegn og því varð uppi fótur og fit þegar einn kjóllinn varð eftir í Keflavík. Spurð hvort svona sparsamir kvikmyndagerðarmenn, sem setja það ekki fyrir sig að deila herbergjum, skili einhverjum gjaldeyri til landsins segir Elísabet svo vera. „Þetta eru einhverjir peningar." freyrgigja@frettabladid.is