Ronaldo ætlar ekki að fara frá United

Cristiano Ronaldo segir ekkert til í staðhæfingum spænskra fjölmiðla sem um helgina fullyrtu að hann væri á leið til Real Madrid í sumar.

"Ég er ánægður hjá Manchester United og tel að þetta sé rétta félagið fyrir mig," var haft eftir Ronaldo á Sky.

Því var haldið fram í spænskum miðlum að Ronaldo væri orðinn leiður á þeirri hörðu meðferð sem hann fær frá varnarmönnum á Englandi.

"Þetta hefur alltaf verið svona. Það er bara eðlilegt að menn reyni að sparka í mig til að stöðva mig," sagði Ronaldo.

Hann er líka viss um að United nái að verja enska meistaratitilinn eftir góðan sigur á Aston Villa í gær.

"Við erum besta lið Englands og sýnum það með því að vera í efsta sætinu í deildinni. Við berum virðingu fyrir andstæðingum okkar en ef við höldum áfram að vinna, verðum við meistarar aftur. Við höfum enn möguleika á að vinna alla titla sem í boði eru á leiktíðinni," sagði Ronaldo.