Segir stöðu Landsvirkjunar betri en flestra annarra fyrirtækja

„Ég held að það megi segja að fjárhagsleg staða Landsvirkjunar sé góð í samanburði við vel flest íslensk fyrirtæki - í raun og veru mjög góð," sagði Steingrímur J. Sigfússon fjármálaráðherra við utandagskrárumræður um Landsvirkjun á Alþingi í dag. Það var Vigdís Hauksdóttir, þingmaður Framsóknarflokksins, sem óskaði eftir umræðunni en hún hefur lýst yfir áhyggjum af stöðu fyrirtækisins.

Steingrímur benti á að fyrirtækið hafi lokið fjárfestingarverkefnum sem það hafði staðið í meira og minna samfellt síðan 1995. Fyrirtækið hefði ekki skuldbundið sig til þess að ráðast í nein ný verkefni og áhvílandi skuldir og tekjustreymi fyrirtækisins lægju því skýrt fyrir. Hann benti jafnframt á að gjaldfellingar á lánum væru ekki á næsta leiti.

Steingrímur sagði þó að fjárhagsstaða Landsvirkjunar væri veik í alþjóðlegum samanburði. Ástæðan væri sú að fyrirtækinu hafi ekki verið lagt til nýtt eigið fé þrátt fyrir miklar fjárfestingar um árabil.