Ribery missir líklega af umspilsleikjunum

Frakkinn Franck Ribery, leikmaður Bayern München, mun líklega missa af leikjum Frakka og Íra í umspili um sæti á HM í Suður-Afríku í sumar.

Leikirnir fara fram í næsta mánuði en Ribery hefur átt við erfið hnémeiðsli að stríða. Búist er við því að hann verði frá í fjórar vikur til viðbótar en hann missti einnig af landsleikjum Frakka gegn Færeyjum og Austurríki fyrr í mánuðinum.

Louis van Gaal, stjóri Bayern, vildi þó ekki staðhæfa hversu lengi Ribery yrði frá. „Ég get ekki staðfest hversu lengi hann verður frá vegna meiðslanna. Endurhæfingin gæti tekið um mánuð en við viljum ekki vera nákvæmari en það," sagði van Gaal í samtali við þýska fjölmiðla.

Franska dagblaðið L'Equipe fullyrðir að meiðsli Ribery gætu verið það alvarleg að hann verði frá fram í mars næstkomandi.

Alain Boghossian, aðstoðarlandsliðsþjálfari Frakka, staðfesti í samtali við franska fjölmiðla að hann reiknaði ekki með því að Ribery gæti spilað með landsliðinu gegn Írum.