Rannsókn FIFA á Maradona hafin

Talsmaður Alþjóða knattspyrnusambandsins, FIFA, hefur staðfest að sambandið hefur hafið rannsókn á málefni Diego Maradona, landsliðsþjálfara Argentínu.

Maradona blótaði gagnrýnendum sínum í sand og ösku eftir að Argentína tryggði sér sæti á HM með 1-0 sigri á Úrúgvæ í síðustu viku. Þá náðust myndir af honum eftir leik þar sem hann þótti sýna afar ósæmilega hegðun.

Talsmaðurinn, Nicolas Maingot, sagði í samtali við fréttastofu AP að rannsókn á þessu agamáli væri hafin en vildi að öðru leyti ekki tjá sig um það.

Áður hefur verið greint frá því að möguleiki er á því að Maradona verður dæmdur í fimm leikja bann.