Ronaldo spilaði og fékk glóðarauga - myndband

Brasilíumaðurinn Ronaldo spilaði í gær sinn fyrsta leik í langan tíma eftir erfið meiðsli eftir að hann kom inn á sem varamaður í leik með Corinthians í Brasilíu.

Ronaldo hefur verið frá síðan hann meiddist á hné í leik með AC Milan þann 13. febrúar í fyrra. Hann hefur síðan þá unnið hörðum höndum að því að ná sér aftur góðum.

Hann komst reyndar í fréttirnar í sumar fyrir að bæta aukakílóum á sig en er óður að nálgast sitt fyrra form.

Áhugi fréttamanna var mikill á leiknum. Eftir leikinn stormuðu margir inn á völlinn og hópuðust í kringum Ronaldo. Einn fréttamaðurinn var svo ákafur að hann rak hljóðnema í auga Ronaldo þannig að hann fékk glóðarauga.

"Ég var sleginn með tveimur hljóðnemum og fékk sjónvarpsmyndavél í andlitið. Þetta er mjög erfitt fyrir mig því ég er vanur því að spila í Evrópu og þar er skipulagið allt annað," sagði Ronaldo á blaðamannfundi eftir leikinn.

"Ég varð mjög skelkaður í leikslok þegar ég sá fullt af mönnum hlaupa í áttina til mín," sagði Ronaldo sem var kominn með glóðurauga eftir atgang blaðamannanna sem þutu í tugatali inn á völlinn um leið og leikurinn var flautaður af.

Í Brasilíu gilda aðrar reglur um blaðamenn en gengur og gerist. Þeir mega hópast að hliðarlínunni og fyrir aftan mörkin og það hefur margoft gerst að sjónvarpsmenn reyni að fá menn í viðtal í miðjum leik.

Þetta var fyrsti leikur Ronaldo síðan að hann meiddist illa á hné í febrúar í fyrra. Hann hóf ferillinn með Cruzeiro í Brasilíu en yfirgaf landið 17 ára gamall til þess að spila með PSV Eindhoven. Hann hefur síðan spilað með Barcelona, Inter Milan, Real Madrid og AC Milan.

"Ég er ánægður með að vera búinn að spila fyrsta leikinn því það léttir pressu af mér. Nú þarf ég bara að létta mig enn meira og komast í betra form," sagði Ronaldo.

Myndbandsupptöku af þessu má sjá hér.