Luka Kostic samdi við Grindavík til tveggja ára

Luka Kostic þjálfar Grindavík næstu tvö árin en skrifað var undir samning skömmu fyrir lokahóf knattspyrnudeildar félagsins á laugardagskvöldið.

Luka Kostic tók við Grindavíkurliðinu eftir þrjár umferðir í sumar þegar liðið lá á botninum án stiga. Grindavík tókst að halda sæti sínu í deildinni og varð í 9. sæti.

„Samningurinn við Luka Kostic gildir út árið 2011. Þegar hann tók við Grindavík í sumar var gerður þriggja ára rammasamningur með uppsagnarákvæði í haust. Báðir aðilar voru sammála um að halda samstarfinu áfram og skrifa undir nýjan samning enda samstarfið gengið vel. Nú er verið að skoða leikmannamál Grindavíkur og verða nokkrar breytingar á liðinu sem miða að því að Grindavík ætlar sér stærri hluti á komandi árum," segir í fréttatilkynningu frá Grindvíkingum.

Á lokahófi knattspyrnudeildar var Gilles Mbang Ondo valinn besti leikmaður Grindavíkur á nýliðinni leiktíð og Jósef Kristinn Jósefsson efnilegastur.

Hjá GRV var Ása Dögg Aðalsteinsdóttir kjörin besti leikmaðurinn og Dagmar Þráinsdóttir efnilegust.