Valencia að taka u-beygju í máli David Villa?

Spænskir fjölmiðlar greina nú frá því að Valencia sé að íhuga að halda David Villa áfram hjá félaginu en leikmaðurinn er eftirsóttur af flestum stærstu félögum heims.

Haft er eftir umboðsmanni Villa í samtali við spænska fjölmiðla í dag að forráðamenn Los Che séu nú jafnvel á báðum áttum með að selja leikmanninn yfir höfuð.

„Forráðamenn Valencia eru búnir að skipta um skoðun varðandi Villa. Þeir segja núna að þeir vilji ekki selja leikmanninn. Þetta er ótrúlegt því við erum búnir að leggja í mikla vinnu við að tala við áhugasöm félög og þessi ákvörðun þeirra hentar í raun engum," segir umboðsmaðurinn Jose Luis Tamargo.

Búist var við því að hinn 27 ára gamli Villa myndi ganga í raðir Real Madrid á allra næstu dögum en nú virðist vera komið babb í bátinn.