Virkja þarf í Krýsuvík og Eldvörpum fyrir Helguvík

Össur Skarphéðinsson skýrði frá því í Fréttablaðiðinu um helgina að hann hefði gefið grænt ljós á stuðning ríkisstjórnarinnar við 360 þúsund tonna álver í Helguvík, en um leið sagði hann að ekki yrði þörf á virkjunum í neðri Þjórsá vegna stærra álvers.

Endurskoðuð áform Norðurálsmanna gera ráð fyrir að álverið verði byggt í fjórum áföngum sem teknir verði í notkun á árabilinu 2011 til 2015. Samkvæmt upplýsingum Stöðvar tvö geta þeir vænst þess að fá að hámarki 250 megavött frá Hitaveitu Suðurnesja og önnur 250 frá Orkuveitu Reykjavíkur og þeir þurfi 100 til 150 megavött frá Landsvirkjun.

Guðlaugur Sverrisson, stjórnarformaður Orkuveitu Reykjavíkur, segir að 615 megavött þurfi til álversins. Orkuveita Reykjavíkur og Hitaveita Suðurnesja muni útvega hluta orkunnar en Landsvirkjun þurfi greinilega einnig að koma að verkefninu.

Landsvirkjun gæti þurft að skaffa enn meiri orku vegna óvissu um orkuöflun Hitaveitu Suðurnesja, sem þarf að virkja bæði í Krýsuvík og Eldvörpum, en viðkomandi sveitarfélög, Hafnarfjörður og Grindavík, hafa hvorugt fallist á þau áform.

Norðurálsmenn óskuðu fyrr í vetur eftir orkukaupum frá Landsvirkjun en samkvæmt heimildum Stöðvar tvö vísuðu Landsvirkjunarmenn þeim á ríkisstjórnina. Þetta væri með öðrum orðum pólitísk ákvörðun sem fulltrúar eigenda Landsvirkjunar yrðu að taka. Breyta þyrfti ársgamalli stjórnarsamþykkt Landsvirkjunar, um að ekki verði samið að sinni um orkusölu til nýrra álvera á Suður- eða Vesturlandi, en einnig kalla virkjanir í neðri Þjórsá á eignarnám jarða sem iðnaðarráðherra þarf að framkvæma. Landsvirkjunarmenn telja sig ekki hafa aðra kosti en neðri Þjórsá þar sem Búðarhálsvirkjun hefur þegar verið eyrnamerkt Straumsvík og raforkuflutningar úr öðrum landshlutum eru taldir óraunhæfir.

Norðurálsmenn eru tilbúnir að leggja af stað með Helguvíkurframkvæmdir þótt eftir verði að tryggja orku í fjórða og síðasta áfanga álversins og gefur það ríkisstjórnarflokkunum færi á að fresta óþægilegri ákvörðun um umdeildar virkjanir, jafnvel um einhver ár.

Yfirlýsing iðnaðarráðherra, um að ekki sé þörf á Þjórsárvirkjunum vegna Helguvíkur, er hins vegar að mati viðmælenda fréttastofu fremur byggð á óskhyggju en raunsæju mati og talin sett fram í von um að forða innanflokksátökum.

Skýr merki þess að tekið sé að krauma innan Samfylkingarinnar vegna Helguvíkur sáust í dag þegar Græna netið, umhverfishópur innan flokksins, sendi frá sér ályktun þar sem Össur Skarphéðinsson er harðlega gagnrýndur fyrir fjárfestingarsamning vegna álversins.