Ástralía og Suður-Kórea taplaus

Ástralía og Suður-Kórea léku í dag sína síðustu leiki í undankeppni HM 2010 í Asíu. Bæði lið komust taplaus í gegnum lokaumferð undankeppninnar.

Undankeppnin í Asíu er með allt öðru sniði en í Evrópu en tíu lið komust áfram í fjórðu umferð undankeppninar. Liðunum tíu var skipt í tvo riðla og tvö efstu liðin úr hvorum riðli komast áfram í lokakeppnina í Suður-Afríku á næsta ári.

Í A-riðli voru Ástralía og Japan búin að tryggja sér efstu tvö sætin en þessi lið mættust í morgun í úrslitaleik um efsta sæti riðilsins. Ástralía vann, 2-1, með tveimur mörkum frá Tim Cahill. Marcus Tulio Tanaka skoraði mark Japana.

Suður-Kórea var búið að tryggja sér efsta sætið í B-riðli en liðið gerði í morgun 1-1 jafntefli við Íran. Ji-Sung Park skoraði mark Suður-Kóreu.

Mikil spenna er um annað sæti riðilsins en Norður-Kórea og Sádí-Arabía eru bæði með ellefu stig og mætast í dag. Sigur eða jafntefli dugir Norður-Kóreu.

Liðin sem verða í þriðja sæti riðlanna tveggja mætast svo í tveimur aukaleikjum, heima og að heiman. Sigurvegari þeirra leikja mæta svo Nýja-Sjálandi, einnig heima og að heiman, um sæti á HM á næsta ári.

Barein og Úsbekistan mætast í dag í A-riðlinum í hreinum úrslitaleik um það sæti en staðan er aðeins flóknari í B-riðli þar sem að Íran er með ellefu stig, rétt eins og Norður-Kórea og Sádí-Arabía.