Borgarstjóri á ferð og flugi á fjölmennri Menningarnótt

„Dagurinn er búinn að vera mjög góður og hátíðin gengur vel fyrir sig. Þetta er fjölbreytt Menningarnótt og mikið að gerast," segir Hanna Birna Kristjánsdóttir, borgarstjóri Reykjavíkur.

Hanna hefur verið á þönum vegna Menningarnætur Reykjavíkurborgar í dag, en mikill fjöldi fólks hefur lagt leið sína í Reykjavíkurborg í dag til að taka þátt í hátíðinni.

Hún hóf daginn á að setja hátíðina í Hljómskálagarðinum, þar sem Raggi Bjarna flutti nýtt Reykjavíkurljóð sem Gunnar Þórðarson og Ómar Ragnarsson höfðu gefið Reykjavík. Þvínæst fór hún í stjórnarráðið þar sem Jóhanna Sigurðardóttir tók á móti henni og formanni borgarráðs og bauð þeim í skoðunarferð um húsið. Þá tók Hanna einnig á móti gestasveitarfélagi Menningarnætur, Árborg.

„Ég er búin að vera að fara á milli staða og upplifa þessa skemmtun," segir Hanna.

Aðspurð hvað henni þyki skemmtilegast við hátíðina svarar Hanna:

„Fólkið, samkenndin og fjölbreytnin. Það er gaman að sjá hversu mikla vinnu margir borgarbúar leggja í að gera hátíðina skemmtilega, bæði listamenn og íbúar. Það er alls kyns frumkvæði sem sprettur fram á þessum degi."

Gærdagurinn markaði tímamót hjá Hönnu Birnu, en þá hafði hún setið slétt ár í borgarstjórastól Reykjavíkur. Hún segir árið hafa verið viðburðaríkt og telur alla borgarstjórn, bæði meirihluta og minnihluta, hafa unnið vel úr fyrirliggjandi verkefnum og náð að innleiða ný vinnubrögð í stjórnmálum.

Hanna ætlar þó ekki að láta áhyggjur hversdagsins hvíla þungt á sér á menningarnótt.

„Í kvöld ætla ég, eins og aðrir borgarbúar að njóta flugeldasýningarinnar og vera með fjölskyldunni," segir Hanna Birna glöð í bragði.