Sigmundur Davíð: Skjalið sem lak ekki það sama og ég sá

Sigmundur Davíð Gunnlaugsson, formaður Framsóknarflokksins, segir skjalið um fyrirvara við Icesave samninginn sem lekið var á heimasíðu Egils Helgasonar á Eyjunni og síðan birtist í Morgunblaðinu ekki vera skjalið sem hann sá í gærkvöldi.

Hann segir fyrirvarana í skjalinu sem lekið var ganga lengra, og því líti skjalið betur út fyrir stjórnarflokkana.

„Þetta er hluti af þessari tilhneigingu til þess að reyna að stýra málum með hannaðri atburðarás eða í gegnum fjölmiðla," segir Sigmundur um lekann í Kastljósinu í kvöld.

Hann segir að aðilar af hálfu Samfylkingarinnar hafi komið þeirri sögu af stað að hann hefði lekið skjalinu, sem hann segir af og frá, til að valda uppnámi og einangra Framsóknarflokkinn.

Hann gagnrýndi fjölmiðla fyrir að taka þátt í leiknum.

Helgi Hjörvar, þingmaður Samfylkingar, sagði Sigmund varla taka til máls í umræðuþáttum nema til að væna Samfylkinguna um samsæri.

„Í þessum þætti, eins og svo fjölmörgum öðrum þar sem ég hef fylgst með Sigmundi, að það er varla að hann taki til máls nema ráðast á Samfylkinguna eða telji hana vera í samsæri gegn sér. Ég held að það sé okkur ekki til neins framdráttar að fullyrða að Framsóknarflokkurinn hafi lekið þessu eða spunameistarar Samfylkingarinnar."

Helgi bætir við að það ógeðfellda við lekann sé að allir liggi undir grun og hann óhreinki þjóðþingið á viðkvæmri stundu.