Ancelotti: Erum búnir að innsigla ávísanaheftið

Knattspyrnustjórinn Carlo Ancelotti hjá Chelsea hefur staðfest að Lundúnafélagið ætli sér ekki að eyða meiri peningum í leikmannakaup í sumar en félagsskiptaglugganum lokar 1. september næstkomandi.

Chelsea hefur farið vel af stað í ensku úrvalsdeildinni og Ancelotti kveðst ánægður með þann leikmannahóp sem hann hefur í höndunum.

„Það er enn ein vika til stefnu á leikmannamarkaðnum en fyrir mér er bókin lokuð. Við erum búnir að innsigla ávísanaheftið. Ég vissi þegar ég kom til félagsins að ég væri með frábæran leikmannahóp í höndunum og það er raunin.

Félagið er samt tilbúið að bakka mig upp ef ég vill fá einhvern nýjan leikmann," segir Ancelotti sem stýrir Chelsea gegn Fulham í sínum fyrsta Lundúnaslag með liðið í ensku úrvalsdeildinni í dag.