Knapi rekinn úr íslenska landsliðinu í hestaíþróttum

Þórður Þorgeirsson, tamningamaður og knapi, hefur verið rekinn úr íslenska landsliðinu í hestaíþróttum vegna agabrota. Fréttavefurinn Hestafréttir.is greindi frá þessu í hádeginu.

Heimsmeistaramót íslenska hestsins stendur nú yfir í Brunnadern í Sviss. Þórður var valinn í landsliðið sem kynbótaknapi og átti að sýna stóðhestinn Kjarna frá Auðsholtshjáleigu í kynbótadómi í flokki sex vetra stóðhesta. Þórður átti að sitja Kjarna í yfirlitssýningu í dag.

Á síðasta sunnudagskvöld var haldið svokallað Landakvöld á mótssvæðinu í Brunnadern. Myndbandi frá því kvöldi hefur verið lekið á vefsíðuna Youtube en á því sjást landsliðsmennirnir stíga sporið við hin ýmsu lög, meðal annars hið margrómaða Macarena. Þórður hefur sig þó hvað mest í frammi. Á spjallsvæði Hestafrétta ræða menn mikið um það sem fyrir augu ber á myndbandinu og eru skiptar skoðanir. Sumum þykir í lagi að menn lyfti sér upp, öðrum finnst þannig hegðun ekki sæma mönnum sem eru að keppa á alþjóðlegu móti fyrir Íslands hönd.

Á Hestafréttir.is er rætt við Einar Öder Magnússon sem staðfesti við vefinn að Þórði hefði verið vikið úr landsliðinu. Þar segist hann hafa varað Þórð við, en það ekki dugað. „Agabrot af þessu tagi eru ófyrirgefanleg og hestamennskunni til vansa," segir Einar í samtali við Hestafréttir.

Í viðtali Hestafrétta við Einar er líkum að því leitt að fleiri hafi gerst brotlegir á svipaðan hátt og Þórður. Einar er því spurður hvort ekki eigi jafnt yfir alla að ganga. „Ekki náðist að sanna á fleiri knapa þó sögusagnir segja annað. Þetta er bara mannleg tragedía og hræðilegt að þurfa að taka á, en svona er þetta bara, en ég vill ekki eyða meiri orku eða tíma í þetta leiðinlega mál. Ég ætla að sinna landsliðinu sem er enn í keppninni," segir Einar og bætir við að málið sé úr hans höndum. „Aganefnd ÍSÍ mun taka nánar á málinu."