Parreira sýnir sínu gamla starfi áhuga

Brasilíumaðurinn Carlos Alberto Parreira segir að hann væri reiðubúinn til þess að skoða tilboð þess efnis að taka aftur við þjálfun landsliðs Suður-Afríku.

Á mánudaginn var Joel Santana rekinn úr starfi landsliðsþjálfara eftir að Suður-Afríka tapaði fyrir Íslandi á Laugardalsvelli, 1-0, í síðustu viku.

„Það er möguleiki á því að tilboð berist og ég væri reiðubúinn að skoða það," sagði Parreira. „Svo virðist sem að þeir vilji dvelja við brasilíska tegund af knattspyrnu sem hentar Suður-Afríku vel."

Parreira var landsliðsþjálfari Brasilíu er liðið varð heimsmeistari árið 1994. Hann hætti í starfi sínu sem landsliðsþjálfari Suður-Afríku í fyrra vegna veikinda konu sinnar og mældi með Joel Santana í starfið.

Hins vegar hefur gengi Suður-Afríku undanfarið ár verið skelfilegt og liðið tapað átta af síðustu níu leikjum sínum.