Eiður Smári lék allan leikinn í tapi Monaco

Eiður Smári Guðjohnsen var í byrjunarliði Monaco og lék allan leikinn í 2-0 tapi liðsins gegn Auxerre í frönsku úrvalsdeildinni í kvöld.

Auxerre vann þar með sinn sjöunda leik í röð og vermir nú toppsæti deildarinnar en Monaco er í sjötta sæti.

Adama Coulibaly kom Auxerre yfir með marki í uppbótartíma fyrri hálfleiks en Auxerre hafði fram að því verið betri aðilinn.

Delvin Ndiga innsiglaði svo sigur heimamanna með marki þegar skammt lifði leiks.

Eiður Smári var að spila ágætlega með Monaco og átti eitt besta færi liðsins í leiknum þegar góður skalli hans á 56. mínútu var varinn vel af markmanni Auxerre.