Flokksmenn VG saka eigin formann um klækjastjórnmál

Ellefu flokksmeðlimir Vinstri grænna, þar af einn bæjarfulltrúi á Akureyri, skrifa undir opið bréf til Steingríms J. Sigfússonar, formanns Vinstri grænna, og saka hann um að vera ómerkingur orða sinna tryggi hann frumvarpi um ESB brautargengi á þingi.

Það var Guðbergur Egill Eyjólfsson sem skrifaði bréfið sem er harðort. Allir þeir sem undir bréfið skrifa tilheyra Vinstri grænum í norðaustur kjördæmi. Bæjarfulltrúinn er Baldvin H. Sigurðsson.

Í bréfinu segir meðal annars: Hvernig má það vera að eftir á allt sem undan er gengið og skýra stefnu flokksins í þessum málaflokki ætlir þú Stengrímur J. Sigfússon að styðja frumvarp um aðildarumsókn Ísland að Evrópusambandinu.

Ef ekki hafa orðið sinnaskipti hjá þér þá hlýtur að vera ætlan þín að flækjast fyrir málinu á öðrum stigum málsins. Ef svo er ert þú farinn að stunda þau klækjastjórnmál sem að mínu viti var verið að berjast gegn í búsáhaldarbyltingunni og Vinstrihreyfingin grænt framboð hefur svo oft fordæmt.

Og áfram heldur Guðbergur og skrifar að ef Steingrímur samþykki frumvarpið um ESB þá sé hann orðinn ómerkingur orða sinna. Og ekki eingöngu það, heldur hafi hann gert eigin flokksmenn ómerkinga orða sinna þar sem þeir stóðu í þeirri trú að flokkurinn myndi ekki færast nær Evrópusambandinu. Slíkur hafi málflutningur þeirra verið hingað til.

Og að lokum skrifar Guðbergur:

Ég hef rætt við marga innan hreyfingarinnar og ekki enn fundið neinn sem er sammála þeirri leið sem þú og meiri hluti þingmanna okkar ætlar að fara. [...] Þú varst ekki kosinn á Alþingi Íslendinga af kjósendum Vinstrihreyfingarinnar græns framboðs til þess að samþykkja þesslags frumvarp.

Opna bréfið má lesa í heild sinni hér fyrir neðan.