Krían gerir Bolvíkinga rauðhærða

„Nei, hún er ekki að gera okkur gráhærð. Hún er að gera okkur rauðhærð. Hún heggur og þá rennur rautt,“ segir Halla Signý Kristjánsdóttir fjármálastjóri Bolungarvíkurkaupstaðar.

Sérstætt vandamál er komið upp í Bolungarvík en svo mjög hefur kríuvarpi vaxið ásmegin við bæinn að stofnað hefur verið til sérstakra undirskriftalista þar sem farið er fram á að lausn finnist á vandamálinu.

Samkvæmt upplýsingum frá Samkaup Úrval hafa nú þegar skráð sig á lista sem þar liggur frammi hátt í fjörutíu manns.

„Þeir eru nokkrir sem hafa orðið fyrir árás kríunnar. Hún er hérna á sandinum, við golfvöllinn, og það er pirringur út af þessu. Það varð slys, maður á mótorhjóli fékk kríu framan í sig. En þetta er friðaður fugl og lítið sem við getum gert þó þetta mál hafi komið inn á borð til okkar,“ segir Halla Signý – en bæjaryfirvöld hafa leitað til Náttúrustofu Vestfjarða og spurt hvort finna megi á þessu vandamáli ásættanlega lausn.

Halla Signý dregur ekki úr því að krían sé sérlega árásargjörn um þessar mundir – kolvitlaus nú þegar ungarnir eru að koma. Þarna er æðarvarp og krían sækir í það. Og skilyrði fyrir kríu virðast sérlega hagstæð því kríubyggðin hefur blásið út.

„En við höfum ekkert á móti kríunni. Og bjóðum hana velkomna eins og aðra í Bolungarvík. En það væri gott ef hægt væri að finna lausn á á þessum sambúðarvanda en manni og kríu virðist ekki ætlað að vera nágrannar svo vel sé.“- jbg