Segir hratið verða eftir í ríkisbönkunum með eigandastefnunni

Tryggvi Þór Herbertsson setti verulega fyrirvara við eigandastefnu ríkisins í umræðum á Alþingi í dag. Drög að eigandastefnunni voru kynnt fyrir þinginu fyrr í dag, en Vísir birti drögin í gærmorgun.

Tryggvi gagnrýnir hugmyndir um að laun forstjóra fjármálastofnana ráðist í kjararáði og séu þar með takmörkuð við laun forsætisráðherra.

„Laun í ríkisbönkunum verða ekki samkeppnishæf við einkabankana Glitni og Kaupþing, þeir munu raka til sín öllum bestu starfsmönnunum og það verður þá hratið sem verður eftir í ríkisbönkunum," segir Tryggvi og bætti við að valdsvið stjórnenda ríkisbankanna væri takmarkað með ráðstöfuninni.

Hann sagði plaggið þó ágæta fyrstu tilraun en vildi vinna það mun betur og hafa til hliðsjónar eigandastefnur Norðmanna og Svía.

Helgi Hjörvar, þingmaður Samfylkingarinnar, benti þá á að í ljósi sögunnar væru margir lágt launaðir ríkisstarfsmenn sem hefðu skilað ólíkt betra starfi í fjármálageiranum en hátt launaðir bankamenn.

Hann frábað þingmönnum að fjalla um ríkisstarfsmenn eins og þeir væru hrat.

Almennt fögnuðu þingmenn úr stjórn og stjórnarandstöðu þó að drögin væru komin fram í þinginu, þótt þeir hefðu mismunandi skoðanir á innihaldi þeirra.